អង់គ្លេស៖ ខ្សែប្រយុទ្ធវ័យ ២០ឆ្នាំ Bryan Gil បានព្រមព្រៀងក្នុងការផ្ទេរជាផ្លូវការពីក្លិបអេស្ប៉ាញ Sevilla មកកាន់ក្លិបអង់គ្លេស Tottenham Hotspurs ក្នុងកិច្ចសន្យារយៈពេល ៥រដូវកាល ពោលគឺរហូតដល់ខែមិថុនា ឆ្នាំ២០២៦។ នេះបើតាមការបញ្ជាក់ផ្លូវការរបស់ក្លិប។

តាមសេចក្តីប្រកាសរបស់ Spurs បានឱ្យដឹងថា Bryan Gil បានចូលរួមជាមួយ Sevilla តាំងពីឆ្នាំ ២០១២ និងមានឱកាសបង្ហាញខ្លួនក្នុងឈុតធំលើកដំបូងនៅឆ្នាំ ២០១៩ ដោយបង្ហាញខ្លួនសរុប ១២លើកនារដូវកាលនោះ ហើយរកគ្រាប់បាល់ក្នុងការប្រកួតនៅលីគកំពូលអេស្ប៉ាញលើកដំបូងទល់នឹងក្រុម Rayo Vallecano នៅខែមេសា ឆ្នាំ២០១៩នោះតែម្តង។ ក្រោយមកនៅឆ្នាំ២០២០ ត្រូវបានក្លិប Sevilla ដាក់ឱ្យក្លិប Leganes ខ្ចីជើង មុននឹងបន្តចូលរួមជាមួយ Eibar កាលពីរដូវកាលមុន។ Gil ក៏ជាយុវជនក្រុមជម្រើសជាតិអេស្ប៉ាញ ដែលបានរួមចំណែកឈ្នះពាន UEFA U-19 Championship ២០១៩ និងជួយឱ្យអេស្ប៉ាញឈានដល់វគ្គពាក់កណ្តាលផ្តាច់ព្រ័ត្រពាន UEFA U-21 កាលពីពេលថ្មីៗផងដែរ។ ដោយឡែក Bryan Gil នឹងត្រូវផ្លាស់មកកាន់ក្លិប Tottenham Hotspurs ជាផ្លូវការ ក្រោយពីរូបគេបញ្ចប់យុទ្ធនាការអូឡាំពិកជាមួយអេស្ប៉ាញ នៅទីក្រុងតូក្យូប្រទេសជប៉ុន។

ដោយឡែក ក្នុងកិច្ចព្រមព្រៀងនោះដែរ Spurs ក៏បានបញ្ជាក់ពីការព្រមព្រៀងជាផ្លូវការក្នុងការផ្ទេរកីឡាករ Erik Lamela ទៅកាន់ Sevilla នារដូវកាលថ្មីនេះផងដែរ ដោយ Spurs បានចំណាយលុយប្រមាណ ២៥លានអឺរ៉ូ រួមជាមួយប្រាក់បន្ថែមផ្សេងៗទៀតប្រមាណ ៥លានអឺរ៉ូ ដើម្បីទទួលបាន Bryan Gil។ Lamela នឹងទទួលបានកិច្ចសន្យាចំនួន ៣រដូវកាលនៅអេស្ប៉ាញ៕